Keine Rathauserstürmung an Altweiberfastnacht
Weil die wilde Hexenschar der Ramsteiner Bruchkatzen am Altweiberdonnerstag das Rathaus aufgrund der Pandemiebeschränkungen nicht wie gewohnt erstürmen konnten, haben die Damen einen Brief an Bürgermeister Ralf Hechler geschrieben, um ihr Bedauern auszudrücken:
So ihr Männer, gebt schää Acht,
in Ramschde is jetzt Fassenacht!
Denne Dunnerschdach, so muss es gesetzlich sinn,
komme die Narre leider net in de Regierungstempel eninn.
A unser goldisch Prinzepaar
mit seiner grie-weiße Narreschaar,
derf net komme am Ralf sei Rathaus
und muss bleiwe dehäm im eischene Haus.
Desdewä müsse die Herre Am Neije Markt 6,
das Mol a verzischde uff die Hex‘.
Unn wenn ner glaawe mir hann eich net im Au‘,
bei de Ramschder Njuus sieh mer alles gaaanz genau!
Dies Mol hätte ner ganz besonnersch gelitt‘,
wemmer eich die Schlipse hätt abgeschnitt!
Gefesselt hätte mer eich mit‘m Sääl im Brunne,
do wäre känner von eich mehr entkumme!
Unn wie gern hätte mer eich mit‘m Bääse verdrosch,
uff de Hinnere unn uff die Gosch!
Ach was misse mer dies Johr uff alles verzischde,
wer macht jetzt die Berliner unn de Sekt zunischde?
Ä gutes hat‘s - de Sekt werd net schlecht,
drum feiere mer neggschd Johr e rischdisches Feschd.
Do brauche ner dann mehr Krawadde unn mehr Sekt,
dann werd‘s net so schlimm, was mer jetzt hann ausgeheckt!
Ehr misse wisse, mer hann jetzt mehr Zeit,
drum mache eich uff neggschd Johr bereit!
Der bleede Virus dut eich dies Johr verschone,
drum du mer Eich 2022 gleich doppelt belohne!
Mer wärn versuche uff unserm Bääse se reite,
um es Coronavirus in die Geschichte zu vertreiwe,
damit mer widder hübsch gestylt ins Rathaus eninrenne
unn Selles erstürme, so wie ehr’s unn uns kenne!
Zwar due mer Hexe jetzt unsrer Aawet nogehe,
das hääßt awwer net, dass ner uns net sehe.
Drum ziehe eich so, wie die Tradition es verlangt,
de Schlips an de Hals und seid gespannt.
Wer wäß in welche Hecke unn Ecke,
doch e paar Weiber mit scharfe Schere stecke!
Unn sollde ner ähner von uns iwwer de Weg laafe,
misser ner noch net emol e Umzuzgsabzeiche kaafe!
Aber mer hoffe dodefor,
kaafe ner im neggschde Johr,
gleich zwää,
dann det sich a die Bruchkatz‘ frää!
Uff die Ramschder Hexeschau
ein dreifach donnerndes
Fastnacht Ralau - Rathaus Ralau - Hexen Ralau